"Global Innovations" şirkətinin Direktor Müavini Həsən Həsənovla görüşdük, "Epoint" layihəsinə qatılmasını və təcrübəli mütəxəssislə yeni işçilərin cəlb olunmasında əsas xususiyyətləri müzakirə etdik.
1. "Azericard" prosessinq mərkəzində və "Azərbaycan Beynəlxalq Bank"ında uzunmüddətli iş təcrübəniz var, "startap" tipli fintex şirkətinə qatılmağınızın səbəbini açıqlaya bilərsiniz?
Korporativ bankçılıq mühitindən ayrıldıqdan sonra həyat yoldaşımla bizneslə məşğul olmağa başladıq. Lakin 3-4 ildən sonra anladım ki, sahəm üçün darıxıram. Və "Facebook"da qeyd etdim ki, vakansiyalara açığam. Üç saat keçməmiş Zeynal bəy (Global Innovations şirkətinin təsisçisi və direktoru) mənə yazıb görüş təyin etdi. Biz görüşdük, o mənə məhsul və ideya haqqında danışdı və mən dərhal razılaşdım. Ertəsi gün mən artıq ofisdə idim və komanda ilə tanış oldum. Beləcə bu "startup"dakı hekayəm başladı.
2. Bu cür layihədə işləməyin müsbət tərəfləri nədir?
Ən cəlbedicisi gənc və şən komanda ilə sürətlə inkişaf edən "startup"dır. Qısa müddətdə çoxlu qələbələr var. Ən qısa müddətdə yeni bir sahəni tez öyrənmək imkanı var.
3. "Global Innovations" şirkətinə yeni işçiləri cəlb edəndə, əsasən hansı xüsusiyyətlərə diqqət edirsiniz?
Mən "soft skills"in, "hard skills"dən daha vacib olduğunu düşünürəm. Komandada işləmək bacarığı və təşəbbüskarlıq peşəkar bacarıqlardan daha vacibdir.
