Video çarx üçün mətn

2013-cü ildə təsis edilən “Birgə və Sağlam” İctimai Birliyinin məqsədi autizm spektr pozuntusu olan şəxslər və onların ailələrinə dəstək olmaqdır. Birlik bu günədək Heydər Əliyev Fondu və Birinci vitse-prezident möhtərəm Mehriban xanım Əliyevanın nəcib dəstəyi ilə autizmli şəxslərin təhsili, cəmiyyətə inteqrasiyası, əmək məşğulluğu və sosial rifahı üçün çoxsaylı layihə və tədbirlər həyata keçirib.

Birliyin nəzdində Bakı və Gəncə şəhərlərində yerləşməklə iki autizm mərkəzi fəaliyyət göstərir. Bakıda yerləşən Autizm Mərkəzi 10 ildir ki, fəaliyyətdədir. 2021-ci ilin 30 dekabr tarixində Heydər Əliyev Fondunun dəstəyi ilə Mərkəzin yeni binasının açılışı olub. Açılış mərasimi möhtərəm Mehriban xanım Əliyevanın iştirakı ilə baş tutub. 2023-cü ilin 11 aprel tarixində “Heydər Əliyev İli” çərçivəsində Heydər Əliyev Fondunun təşəbbüsü, “AzerGold” Qapalı Səhmdar Cəmiyyətinin dəstəyi və Birliyin təşkilatçılığı ilə Gəncə Autizm Mərkəzinin açılış mərasimi baş tutub. Regional miqyasda fəaliyyət göstərən mərkəz autizmli şəxslərə xidmət göstərməklə yanaşı, maarifləndirmə işləri də həyata keçirir, regionda həkim-mütəxəssislərin peşəkar inkişafında dəstək olur. Mərkəzlərdə Prinston Uşaq İnkişafı İnstitutu tərəfindən yaradılmış Tətbiqi Davranış Analizi – ABA terapiya proqramı əsasında 50-dən çox mütəxəssis tərəfindən yüzdən çox autizmli uşaq və gəncə keyfiyyətli xüsusi təhsil xidməti göstərirlir.

Birlik autizm sahəsində mütəxəssis hazırlığı və ictimai maarifləndirməyə də xüsusi əhəmiyyət verir. İndiyədək müxtəlif layihələr çərçivəsində yüzə yaxın mütəxəssisə peşəkar inkişaf təlimləri keçirilib, minlərlə şəxs autizm haqqında məlumatlandırılıb. Bundan başqa, yetmişə yaxın dövlət və özəl qurumlar, yerli və beynəlxalq təşkilatlar, səfirliklər Mərkəzi ziyarət edib və görülmüş işləri təqdirəlayiq qiymətləndiriblər.

Əlaqədar sahələrdə kadr hazırlığına dəstək vermək məqsədilə Birlik ali təhsil müəssisələri ilə də yaxından əməkdaşlıq edir. Birlik 4 ali təhsil müəssisəsi ilə Anlaşma Memorandumu imzalanıb və bu çərçivədə çoxsaylı peşəkar inkişaf və maarifləndirmə tədbirləri həyata keçirib.

İctimai Birlik beynəlxalq təcrübənin araşdırılamsı və ölkəmizdə tətbiqi üçün də davamlı təşəbbüslər göstərir. Avropa İttifaqının nəzdində fəaliyyət göstərən “Autizm-Europe” təşkilatına üzv seçilib, autizmlə bağlı elmi tədqiqatları və layihələri ilə dünyada nüfuz qazanmış ABŞ-nin “Autism Speaks” təşkilatı, həmçinin Türkiyənin nüfuzlu Tohum Autizm Fondu və SOBE fondu ilə də yaxın tərəfdaşlıq edir.

Birliyin autizmli gənclərdən ibarət “Mavi Ürəklər” xor və ritm qrupunun fəaliyyəti də xüsusi qeydə layiqdir. Qrupun rəngarəng mahnı və ritm kompozisiyalarından ibarət maraqlı repertuarı var. Qrup İctimai Birliyə xüsusi çalar qatmaqla yanaşı, autizmli gənclərimizin istedadının aşkarlanmasına və onların inkişafına dəstək olan platforma kimi də fəaliyyət göstərir.

Birliyin autizm sahəsində həyata keçirdiyi ictimai əhəmiyyətli layihələrdən biri də “Beynəlxalq Autizm ABA Azərbaycan” konfransıdır. ABA Azərbaycan konfransı autizm sahəsində elmi-tədqiqatların təşviq edilməsi, əlaqədar sahələrdə mütəxəssislərin yeni elmi araşdırmalarla yaxından tanış olması baxımından xüsusi əhəmiyyətə malikdir. Mötəbər yerli və xarici mütəxəssislərin iştirakı ilə keçirilən konfrans son illər ərzində 3 dəfə təşkil edilib və gələcəkdə də silsilə tədbirlər kimi təşkil edilməsi nəzərdə tutulur.

Əlaqədar sahələrdə kadrların peşəkar inkişafına daha mütəşəkkil formada dəstək göstərə bilmək üçün İctimai Birlik “İnklüziv İnkişafa Dəstək Mərkəzi” əlavə təhsil müəssisəsi təsis edib. Müəssisə bu günədək müxtəlif dövlət və özəl qurumlarla əməkdaşlıq çərivəsində çoxsaylı peşəkar inkişaf təlimləri və maarifləndirmə seminarları təşkil etməyə nail olub.

İctimai Birliyin nəzdindəki Kaşalata Kafeni xüsusi vurğulamaq lazımdır. İnklüziv işçi heyətinə malik kafedə autizmli gənclər peşə bacarıqlarına yiyələnir, müştərilərə xidmət göstərərək sosial həyata inteqrasiya olurlar. Hazırda pilot layihə kimi fəaliyyətdə olan kafe sosial sahibkarlıq təşəbbüsü kimi özünü doğruldub və gələcəkdə say və xidmət çeşidi baxımından genişləndirilməsi nəzərdə tutulur.

Birliyin digər sosial sahibkarlıq layihəsi “Mavili” brendidir. Bu brend altında  müxtəlif bəzək əşyaları və aksesuarlar hazırlanır ki, bunların ərsəyə gəlməsində autizmli şəxslər və onların ailə üzvlərinin yaxından iştirak edir. Bu məhsullar Birliyin nəzdindəki xüsusi adaptasiya edilən avadanlıqlarla təchiz edilmiş atelyedə hazırlanır. Məhsulların satışından əldə edilən gəlir autizmli şəxslərin ailələrinə ianə edilir.

“Birgə və Sağlam” İctimai Birliyi autizmli şəxslərin rifah halının yüksəlməsi üçün dövlətin də yaxından dəstəyi ilə davamlı təşəbbüslər irəli sürür, ardıcıl və sistemli şəkildə fəaliyyətini davam etdirir. Birlik xalqımızın firavan gələcəyinə xidmət göstərən bu çətin və şərəfli yolda dəstək göstərən tərəfdaşlarına autizmli şəxslər adından dərin minnətdarlığını bildirir.